සිසිර තාරකා නින්දේ සිටින විටය
සියල්ල
Jul 18, 2021
පා මුදුව ගලවාගෙන ය
කඩුක්කම් පැහැර ගෙන ය
ඔබ තිලිණ දුන් රිදී මුදුවේ කාන්තිය දියවී ය
නළල් පට තිබූ තැන නැත
සාන්තුවර නින්දේ වසරක් සිටින විට
පෙම් මාලක්කම් ගැසූ අතීතය
ක්ෂය වී ගොස් ය, දියවී ගොස් ය
දැන් අපට අලුතින් පටන් ගත හැකිය
අතින් අත පටලා-මලින් මල ගවසා
කොණ්ඩා ගෙතිය හැකිය
පිච්ච ද, අරලිය ද හිස ගැවසිය හැකිය
මතක නැතැයි සිතෙන හැම මොහොතකම
කොනිත්තා බලා අවදියෙන් බව
සැක හැර දැනගත හැකිය
කුමන පා ඇඟිල්ලේ මුදු දමන්නේදැයි
මුල සිට වාද කළ හැකිය
රවුල වවන්නට අණ දෙන්නට හැකිය
බුලත් කා මුව රත් කර නොගන්නැයි
අවවාද දෙන්නට හැකිය
සියල්ල අවසන,
ඔබව සිසිර-තාරකා නින්දට
පමුණුවන්නට හැකිය
චක්‍රීය අත් වැරැද්දක
වසරින් වසර අපට
ගිලෙන්නට හැකිය
කාංචනා අමිලානි• | ජූනි 19•
